Fa’asea le aiga i le foa’i o latou ele’ele

O le aso ananafi lea na faia ai le fonotaga a le afioaga o Afega ina ua manaomia mai e le Falemai se tusi mai i le nuu, o se fa’amaoniga o lea ua fa’amatuu atu le fanua mo le fausiaina o le Falemai Fa’aitumalo.

O lea mataupu ua fa’aalia ai le fa’agailemalie ma le fa’anoanoa o le tina ia Malia Pouvi o ia o se suli e patino tonu iai le fanua o Sogi lea o lo’o fuafua e fausia ai le Falemai, fa’atasi ai ma le fanua o Mautietie lea o le a fausia ai le Faleaoga Fa’aitumalo a le Kolisi o Sagaga.

Na saunoa Malia e lagona le fa’anoanoa ona o lea sa talosaga i le nuu e taofia le fa’aaogaina o latou fanua, ona e leai se maliega a suli o le aiga i le fanua muamua lea ua fuafua mo le faleaoga, ae o lea foi ua toe lotea mai ma le isi latou fanua mo le faia o le falemai.

O nei fanua uma ua foai i le puletoatasi a le latou matai o Manuaifua Vitale.

“ Sa ou fa’apea e tilotilo mai le matou nuu ma le le itu o le matou aiga, ae o lea ua tilotilo ‘ava latou nao le taliga lava o le tupe, ae o lea matou te nofonofo atu, o lea ua foai atu le matou fanua”.

Na ia fa’aalia e fa’apea “E taua ia te a’u nei fanua e ia lo’u talitonuga o matou tofi mai i le Atua, o fanua na faia e matou tuaa o tuaa ua mavae mo matou, o le matou ola nei i totonu o le matou nuu o matou fanua nei.

Na fa’amalamalama mai e Malia lenei mataupu e fa’apea, e lei alu i le fono ae ua maua fa’amatalaga na oo atu Maulolo Tavita o loo faia le fono a le nuu ananafi ma fa’apea atu i matai ua mana’omia se tusi mai i le latou matai (Manuaifua) e fa’amaonia ai le fa’amatuu atu o le fanua lea i Sogi e fa’aaogaina mo le fausia o le Falemai. E tumu ia i le fa’anoanoa, ona o lea ua sua i le taimi nei le isi latou fanua mo le faleaoga, ae o lea foi ua toe lotea le isi fanua o lo’o nonofo ai i luga.

O le matai o le latou aiga e le nofo mau iinei e nofo i atunuu i fafo i lona olaga atoa.

O lo’o iai le latou taofiga i le fanua lea e faia ai le faleaoga, ona talu ai na fa’ateia o ia ina ua vaaia ua amata ona fa’amama e le Komiti lea e iai Maulolo Matua o le Aoga le fanua.

I le taimi muamua na vaaia ai lea tulaga sa o’o i le tuafafine o le latou matai ma talanoa iai, poo ai e ana le foai lea ua fai i le latou fanua, ae fai mai, o Maulolo lava e leai foi se silafia o le latou matai.

“Sa ou oo i le tuafafine o le matai lea e nofo i Samoa, ma ou fesili iai poo ai e ona le foai ina ua ou vaai ua tatuu i lalo laau o le matou fanua e le PTA. Maulolo Tavita ma lana Komiti”. o Malia lea.

Sa la talanoa ma le tuafafine o le matai, ma fai iai, pe ua ioe mai le matai mai fafo, ae fai mai e leai, e lei ioe le matai e le’i sainia foi ni pepa, na mafua ai ona alu i Mulinuu ma fai mai le tusi e taofia ai le fanua.

Na tali mai lava le tuafafine o le matai, e aua le popole, o loo iai fuafuaga a le matai e maua mai ai tupe.

“ A maua atu se tupe, e maua uma ai matou tupe o matou o suli o aiga”.

“Ou te leiloa po’o fea e maua mai ai lenei tupe” o lana tala lea.

Fai mai Malia na fa’afetai mai lava le tuafafine o le latou matai ia te ia i le lagalaga i mea lelei a le latou aiga.

Sa oo lava i le Ofisa ma fai le tusi e taofia ai le latou fanua, o le aso 22/11/2013 na maua atu ai le tusi, ae o le aso Tofi o le isi vaiaso e sosoo ai sua le fanua, o lenei fanua pe tusa o le 2 eka.

Ae oo i le aso 5 Tesema 2013 na toe fai le fono fa’atopetope a le nuu, ina ua maua le tala ua taunuu mai le matai o le latou aiga o Manuaifua i Samoa.

O lea fono na fa’atauanau ai e le nuu ia le latou matai i le isi fanua lea o Sogi, le fanua lea latou nonofo ai, ese Mautietie leae fai ai le faleaoga.

Na saunoa lenei tama’ita’i o le itu e fa’aalia ai lona fa’anoanoa tele, ona o lea e nonofo atu suli o latou aiga, ae ua fai lava i le pule to’atasi a le latou matai le foai o latou fanua. Ua ioe foi le matai lea o le a ave le fanua o latou e fai ai le falemai, ae fa’afesuiai ma le 20 eka o fanua o Falesaitu mo le matai. “

O lea ua iai le maliega a le alii lea e aunoa ma se logoina o matou suli, pe tapa foi matou.

“Ua lagona ai le fa’anoanoa, pei e foliga mai ua fa’atau e lea matai laititi o le matou aiga le fanua ma fa’atau atu ai ma tagata o nonofo ai” o Malia lea. Ua uma ona faia sainiga pepa e faamaonia ai le uma ona fai le foai a le matai ua foai fanua nei e lua, ae fa’afesuiai O le aso 5 Tesema na oo ai i Mulinuu ma fai le tusi e talo mai ai ia Vitale e oo atu i le aso 6 Tesema mo se feiloaiga, ona o lea e maua ua vave ona alu, ae lei oo atu.

“O lea ua iai le talosaga i Apia e taofia ai le pule fa’amau ma taofia ai Vitale i lona fia pulea to’atasi o matou eleele.”

O lea ua fai i le malosi o le nuu, o le poloketi a le Aoga ona o Maualolo lea e Peresetene. Fai mai o ia o le fanua lea ua fuafua e fai ai le faleaoga e le’o se finagalo o le nuu, ae o Maulolo.

“ E le’o se fuafuaga a le nuu, o Maulolo na sau vili le telefoni ia Vitale, fa’amolemole mana’omia se fanua, toe tasi le masina mei le tupe i Savaii $1.5miliona, foai mai i luga o le telefoni le fanua, sau loa ma Maulolo totonu o le fono ma fai i toeaiina, o la ua ioe mai Vitale” Ave loa e Maulolo i totonu o le nuu, ona o le fanua, talia loa e le nuu, fa’apea le nuu o la ua ok mai o. “ o lenei fanua na foai mai i luga o le telefoni, O se tasi o itu ua laga e Malia e tatau foi i Matagaluega nei ona fesiligia tagata nei e apalai atu i mea o tupe, pe fa’amaonia ma mautinoa e iai ni fanua o tagata nei, e talosaga i le fia miliona e fai ai mea nei.

E faatino mea o la e fai i tua i le va lelei, e tatau ona latou mautinoa lea tulaga. Na ia ta’ua e iai lona talitonuga, o atinae lelei ma fuafuaga lelei mea uma, e pei ona fuafuaina, taumafai foi Maulolo Tavita e talosaga le fia miliona e fai mea nei, ae o le le fiafia i le foa’i to’atasi e le latou matai, ae o lo’o iai suli o le aiga.

“E lei talanoaina pe fa’ailoa mai ua fai lava a ia, ua pei ua iai lona talitonuga e le’o matou o ni tagata o le aiga e le’o matou o ni suli ae tatau ona iloa o matou o suli” I lona iloa ua pei o le foaina o fasi keke ma masi le foaiina o latou fanua i le tulaga lea ua iai.

Ona o le tulaga ua tula’i mai o le a ia le fuafuaga e oo le latou mataupu i le Fa’amasinoga.