Samoa Alualu i Luma?

Ua matuai ogaoga le tulaga ua o’o i ai timuga ma matagi. Ua matua’i fa’atetele ma ua o ese atu ai tagata e saili ni nofoaga malu i so’o se mea latou te mafai ona malu ai i le magaala pisi o Fugalei.

Ae peitai, o lo’o i ai pea lava Pule Pusa. O lo’o ma’alili i lalo o lona fa’amalu e le mafai ona malu uma ai lona tino tele. Mo le fai fa’atoaga mai i Aleisa, na ia fai mai, e le taofia ai le o atu o tagata e fa’atau ana fa’aeleeleaga, e tusa lava pe timu.

O le ala lea e na te le fia tu’ua ai le itu o le auala ina nei misia ia tagata fa’atau lelei. Na siomia le ali’i o Pusa i ana mea-fa’atau, e aofia ai ato esi, o taga talo ma lau luau ma isi lava nai mea laiti. Mo ia, o le feagai ai ma le vaega i le maketi o se mea masani lava talu ona tu’u i lalo e le malo le maketi tuai i Fugalei i le 2012 mo le fausiaina o le maketi fou.

Na ia le malie i le tuai ona fausia le maketi fou, ae e na te lagona foi le leai o se fesoasoani. “Ua faigata tele nei aso i le leai o se maketi,” o lana tala lea. “I tulaga fa’apea, e sili ai i a matou le o i totonu o le fale nai lo le saofafai i fafo i’i, ae o le a ea le mea o le a mafai?

“O lea lava e leai se maketi? Ma o lea na fai mai le malo o lea e alualu i luma le atunu’u. O le a le agai i luma?”

Fai mai le ali’i o Pusa, o le leaga o le tau ua toe laga ai i luga le mataupu o le maketi. “E pei lava ona tou va’ava’ai i ai, o lea matou te nonofo i fafo i le timu, ua lofia uma a matou mea-fa’atau i le lolovaia,” o lana tala lea a’o tusi atu lona lima i le vaega lolovaia o lo’o lata ane.

“Ae, e leai se isi a matou filifiliga ona e leai se isi mea matou te o i ai. Na taua e Pusa, i le maketi o Chan Mow, e mamao ese ma tagata fa’atau, ua leai se isi avanoa i le maketi o Ah Liki i Taufusi. “Ana fa’apea lava ua uma ona fausia le maketi a le malo, semanu e le feagai matou ma ia fa’afitauli o le taumafai e saili se mea e ola ai i le fa’atauina atu lea o a matou fa’aeleeleaga i tulaga fa’apenei.

“O le mea e tatau ona malamalama i ai le malo, a’o talia ai le fausia o lemaketi, o lea e i ai o matou aiga e fafaga. “E mana’omia le fafaga o matou aiga ma e matou te mana’mia foi ni tupe e fai ai na mea.” Fai mai le ali’i o Pusa, e na te iloa lelei le leaga o le maua i ni mai. “O le uiga o lau tala sei tatou tilotilo i ai i le nofoaga,” o lana tala lea.

“E palapala ma le manogi leaga. E te manatu ou te i ai lava i’i pe ana fa’apea e i ai se isi au alaga-tupe? O le mea lea o lea e matou te faia i aso uma e maua ai tupe.”

“E na o le matou talotalo lava ia alofa le malo ma tau fa’amaea ane le maketi fou ina ia mafai ona fa’atau atu ai a matou fa’aeleeleaga i se siosiomaga mama e matou te le pagatia ai mai i le susu ma le velasia pe a vevela le la.” E le o na o le ali’i o Pusa se fai fa’atoaga na i ai i lea aso.

O se tina e 47 tausaga le matua o se fanauga e to’a fitu mai i Foaluga Savai’i, e na te le i manao e fa’ailoa atu lona igoa, ona o popolega i ni aa’fiaga mai i le pulega. Ae peitai, na ia fai mai, o le olaga o se lu’itau lea i Fugalei.

“E le faigofie le saofai i fafo i le timu ma taumafai e fa’atau atu a matou mea-fa’atau, aemaise lava pe a to’atele le au fa’atau meamata i’inei,” o lana tala lea. “O le tausaga ua te’a, na matou fa’aloga ai o le a latou fausia se maketi mo i matou.

“O lea ua o’o mai i le 2014, a’o lea lava matou te i’inei, o le mea masani lava o le saofafai i le timu po’o le la.” “Matou te leiloa po’o fea a matou o i ai.

“E pei lava ona va’ai i ai tagata uma, na muamua lava fau le maketi o Toleafoa, ma taufao ai le au fai fa’atoaga i fafo i le fa’atauina atu o a latou fa’aeleeleaga.” Mo le tina fai-fa’atoaga, o lea e maua mai i Fugalei le tupe latou te mana’omia e ola ai. 

“E faigata tele, ae o lo’o i ai o matou aiga o lo’o tausi, ma e manaia lava pe ana i ai se tatou maketi tele e ofi uma ai tagata i totonu ina ia le toe pagatia ai tagata i le saofafai i fafo i mea susu ma aso mugala.

“E matou te le’i fa’alogo lava i se tala mai i lemaketi. Na pau le mea lea matou te iloa, o le tulaga lea e mafai ona tatou va’ai i ai lea e tupu mai i’i, na pau lava lena.”

Ae peitai, e foliga mai e umi ni masina e fa’atali ai. O le fausaga o le maketi fou, lea ua tatau ona uma i le taimi nei, ua tuai tele.

I le masina o Aukuso talu ai, o se Kamupani mai Saina lea na malo i le galuega fa’akonekarate, o lea lava e fa’atali mo se eletise ma se suavai ina ia fa’apipi’iina.

O le a amata ona fausia e le Kamupani o le Qing Dao le maketi faitau miliona i le aso 1 o Aukuso 2013.

E le o le taimi lea na tu’u e amata ai le fausiaina o lea galuega.

Ua misi le aso e amata ai, e sau mai i tua o le masina na fe’ese’esea’i ai e uiga i se konekarate sa i ai muamua ua to’ilalo i le isi kamupani.

O le tausaga foi ua te’a, na fa’aleaogaina ai e le Pule Sili o le Fa’alapotopotoga o Taui mo Fa’alavelave Fa’afuasei, Malaeulu Lose Niumata, ni tu’uaiga e fa’apea, o le fa’aiuga e tu’uina atu le galuega fa’a-konekarate i le kamupani, o le a toe iloiloina.

Na fa’amalamalama e Malaeulu, e na te leiloa ma ni mea fa’apena.

“Na pau le mea lea ou te iloa, o lea na i ai se FK (taitai o le kapeneta) mai i le Kapeneta lea na ia fa’amaonia mai, o le tauofoga ua tu’uina atu i le kamupani, i se fautuaga mai i le Laulau o Tauofoga,” o lana tala lea. Talu mai ona tu’u i lalo le maketi i le 2012, e le tatai ona amanaia e le Palemia o Tuilaepa Sailele Malielegaoi i faitioga mai i le au fai fa’atoaga.

O faitioga, o lana tala lea, “o le mea lea a tagata e leai ni mata e va’ai ai e fai i aso uma.” Fai mai le Palemia, o le au fai fa’atoaga ia e manana’o e nonofo i vaega paolo, e leai ma se mea e maua.

“Ua fa’atau atu fa’aeleeleaga i autafa o le auala ona e tele ta’avale e faigofie lava ona tutu, ma afai e te lapoa ma augata e oso i fafo ma le ta’avale, na o lou fai atu lava i a’i latou e si’i mai le tautalo i tua o le ta’avale ma avatu i ai le tupe,” o lana tala lea.

“Afai o le auala lea, ua e mauaina lena tupe, ona e fa’ala ai lava lea ma fa’atimu.”